Pinngortitap Paarsisui

Qaqqat qaarsullu nunarsuup qaavata ilaaniipput, inunnit uumasunillu najugarineqarlutik inuuffigineqarlutillu. Qaarsut isumalluutinik pingaarutilinnik, ulluinnarni atortakkatsinnik, soorlu atortussiassanik, savimissanik, kuultinik diamantinillu akoqarput. Qaarsup Inuata inuuffigisatsinnik paarsinissarput mingutsitsisoqannginnissaalu anguniagaraa.

Qaqqami qaartiterigutta, Qaarsup Inuata qaqqaq pissusiatut sannaqalerseqqinniarlugu ukiut millionilikkaat atussavai. Kalaallit Nunaat qaqqanik qaarsunillu sananeqaateqarpoq, ataqqinnillutalu atuinissarput pisariaqarpoq. Qaarsup Inuata nunamut inuuffigisatsinnut ataatsimoorluta akisussaassuseqarnissarput kissaatigaa. Tamattaalluta pinngortitaq paarilluartigu.

Uumasut tamarmik nunarsuarmi nerisaqaqatigiinnermut ilaapput. Inuit uagut uumasut nerisassaqartippaatigut, taakkulu inuunitsinni tunngavitta ilagaat. Uumasut inuata uumasut mingutsitsiffiunngitsumi uumanissaat anguniagaraa. Aamma Uumasut Inuata pinngortitami uumasut oqimaaqatigiinnissaat anguniagaraa.

Nungusaataanngitsumik piniarnissarput aallaaniarnissarpullu pingaaruteqartorujussuuvoq, uumasorpassuit assigiit tammannginniassammata nungunnginniassammatalu. Uumasup Inuata pinngortitami uumasut paarinissaannut pisassaqaannarnissamullu atorfissaqartippaatit. Ataatsimoorluta pinngortitaq paarilluartigu.

Anori nunarsuup silaannaanik pilersinneqartarpoq. Silaannaq nunarsuarmi pinngortitamut uumasunullu annertuumik sunniuteqartarpoq. Anorip Inuata sapinngisani tamaat ukiup ingerlanerani pinngortitami qulakkeerinninnissaq anguniartarpaa. Ukiup nikerarnera pinngortitami oqimaaqatigiissitsilertarpoq, aammalu Pinngortitap Paarsisuinut nukissanik tunisisarluni.

Mingutsitsineq Kalaallit Nunaata silaannaanut uumasunullu akunnitsinniittunut sunniuteqartarpoq, taamaalillunilu inuit nannullu aalisakkanik pisaqarsinnaanerat ajornarnerulertarluni. Anorip Inuata, pinngortitap mingutsinnginnissaanut ikioqataanissannut atorfissaqartippaatit. Ataatsimoorluta pinngortitaq paarilluartigut.

Inneq nakkutigineqarluni nukissamik kiassarnermillu pilersuisinnaavoq. Kisiannili ikuallannerit mingutsitsisinnaapput aammalu inunnut, uumasunut pinngortitamullu ulorianarsinnaallutik. Innerup Inua ikuallannermut akiuuttarpoq, taamaalilluni inuit uumasullu sumiiffinni uumaffigisai ajoqusernaveersaartittarlugit. Innerup Inua putsumut kalerrisaarutinik tusaasaqaleraangami ikiuukkiartortarpoq.

Innerup Inuata ikumatitassi qaminnissanut pinngortitallu paarinissaanut eqqaasittarpaasi. Innerup Inuata putsumut kalerrisaarusersuinissat aammalu pinngortitamiikkaangavit eqqarsarnissat pisariaqartippaa. Ataatsimoorluta pinngortitaq paarilluartigut.

Pinngortitap naggorinnera uumasunut inunnullu nerisassaqartitsivoq inuuniarnermullu tunngaviliilluni. Aamma pinngortitap inuit sakkussiornitsinnut isumalluuteqartippaatigut. Pinngortitap Inuata pinngortitamik paarsinissarput mingutsitsisoqannginnissaalu anguniagaraa. Pinngortitap Inua pinngortitami isumalluutinik atuipilunnginnissarput anguniagaraa.

Kalaallit Nunaanni pinngortitap tunniussassai tamaasa nuannarilluinnartuuagut, taamaallaalli eqqaamasariaqarparput tunniussassai amerlasoorujussuunngimmata. Pinngortitap Inuata mingutsitsinermut akiuiniarnissamut, eqqakkat eqqaavinnut igittarnissaat eqqaamanissaanut aammalu pigisanik, soorlu puussianik plastikkinik atueqqinnissamut atorfissaqartippatigut. Ataatsimoorluta pinngortitaq paarilluartigut.

Imeq isumalluutinut uumasussilinnut uumatitsisuuvoq, soorlu inunnut, uumasunut nunarsuullu naasuinut. Isumalluutit uumassusillit (tassalu inuit, uumasut naasullu) minguitsumik imissaqanngippata nunarsuaq uumaffiusinnaanngilaq.

Kalaallit Nunaanni imaani uumasut aningaasanik isaatitsinerpaaffiupput, aammalu mingutsitsinermit sunnernerlunneqartarlutik. Erngup Inuata kisimiilluni immat, kuuit tatsillu imeqarfiit minguitsuutissinnaanngilai. Ataatsimoorluta pinngortitaq paarilluartigut.