Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Paasititsiniaanermi “Ataatsimoorluta pinngortitaq paarilluarnerutigu” oqaluttuat nuannersut, pinngortitap paarsisuinik inuusaliat, nunarsuarmi anguniakkat 17-it pillugit ilinniutit, aammattaaq angajoqqaanut akuutitsiviusut aqqutigalugit meeqqerivinni meeqqat pinngortitamik paarsinissamut ilinniartinneqassapput.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup Kammagiitta isumassarsiorfigalugu kufferti sammisassanik, perorsaanermut sakkugineqarsinnaasunik imalik ineriartortissimavaa, taakkulu nunatsinni meeqqerivinnut nassiussuunneqassapput. Kufferti sammisassanik imalik meeqqerivinni meeqqat silap pissusia, atueqqinneq, eqqakkat, uumasut naasullu pillugit ilisimasaannik soqutiginninnerinillu annertusititseqataassaaq, kiisalu tamatta pinngortitamik paarsinermi peqataasinnaasugut meeqqanut ilinniartitsinermut atorsinnaassalluni.
”Kuffertimi sammisassanik imalimmi ilinniartitsinermut aliikkusersuinermullu atugassat inuup pinngortitallu imminnut atalluinnarnerinut, tamattalu pinngortitap oqimaaqatigiinneranik atatitseqataanissamut akisussaaffeqarnitsinnik eqqaasitsissapput. Neriuppunga nunarput tamakkerlugu meeqqat kuffertip imaasa akornanni, taamatullu pinngortitami tupinnartortaanilu tamani paasisassarsiulerunik pinngortitap pitsaanerusumik paarinissaanut isumassarsiorumaartut”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Kuffertit sammisassanik imallit meeqqerivinnit tiguneqarpata, perorsaasut meeqqallu atortussanik nuannersorpassuarnik soqutiginaatilippassuarnillu nassaassapput, taakkununngalu Pinngortitap Paarsisuinit inuusaliat, sapaatit akunnerisa naanerini meeqqat angerlaassinnaasaat, taamaalillunilu aamma angajoqqaavisa pinngortitamik paarsinissamik ilinniarnermut akuutinneqarnerinut atorneqarsinnaasut ilaatinneqarput. Tamatuma saniatigut meeqqat eqqakkat pillugit nallukattat (nallukattat biilinik assiliartallit nalinginnaasut isumassarsiorfigalugit sanaat) atorlugit unammisinnaapput, taakkulu atorlugit eqqakkat pinngortitami piffissaq arroriartortarfiat, eqqakkat uumasunut qanoq ulorianartiginersut aammalu eqqakkat ajornanngitsumik atoqqinneqarsinnaanerat pillugit ilinniarsinnaapput.
Paasititsiniaanerup ‘Pinngortitap Paarsisui’-sa ilaraa
Paasititsiniaaneq “Ataatsimoorluta pinngortitaq paarilluarnerutigu” paasititsiniaanerup Pinngortitap Paarsisui-sa ilagaa. Pinngortitap Paarsisuisa – nammineerluta puigoraangatsigu – kalaallit ileqqutoqaannik, tassalu inuit assigilluinnarlugit pinngortitami anersaap tarnillu – Inua – ataqatigiinnerinik eqqaasittussaavaatigut.
Ungasissorsuunngitsukkut videoliaq, paasititsiniaaneq “Ataatsimoorluta pinngortitaq paarilluarnerutigu” pillugu nassuiaaffiusussaq saqqummersinneqartussaavoq.
Paasititsiniaanermut atortussat allat nittartagakkami nutaami www.inua.gl aamma Facebook-ikkut nittartagaq ’Pinngortitap Paarsisui Naturens Superhelte’ aqqutigalugit pissarsiarineqarsinnaapput.
Assit “Ataatsimoorluta pinngortitaq paarilluarnerutigu” saqqummiunneqarnerani takukkit uani.
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi immikkoortortamut pisortaq Paninnguaq Kristiansen, tlf. 34 54 16 imaluunniit e-mail: pan@nanoq.gl aqqutigalugit attaveqarfigineqarsinnaavoq.
Meeqqeriveqarfiit kuffertimik tigusaqarsimanngikkuni, Paninnguaq Kristiansen qulaani attaveqarfissatigut aamma attaveqarfigineqarsinnaavoq.
