Pinngortitap Paarsisuisa Kalaallit Nunaanni pinngortitamut, avatangiisinut silallu pissusianut paarsinerunissamik anguniagaqartuupput. Tamatsinnut isummersuinissamik, kajumissuseqalersitsinissamik anguniagaqartuupput, tamattalu allanngueqataasinnaassuseqarnitsinnik takutitsiniartuullutik 🌿
Paasissutissiiniarneq pilersinneqarpoq kalaallit naleqartitaat inooriaasiallu tunngavigalugit, taamaasilluta oqariartuutaasunut tarrarsorfissaqarlutalu pinngortitarput ataatsimoorluta akisussaaffeqarfiginiassagatsigu. Ukiut ingerlanerini Kalaallit Nunaanni inuit nuannersorsuit naapinnikuuagut, uagutsituulli ataatsimoorluta nunatta paarinissaannut kissaateqartut 🌱
Maannakkullu, Nunavummiit nutaanik ikinngutitaarpugut! 💫
Nunavumminngaanniit inuit aallartitat arfineq-marluk tikeraarivagut, tassani qanoq isillutik illoqarfimminni eqqagassanik annikillisaanissaminnut suliagut ilinniarfigiartorlugit isumassarsiorfigiartorpaat. Pinngortitap Paarsisuinut soqutiginninnerat alapernaannerallu uagutsinnut nuannersuuvoq tulluusimaarnarlunilu – suli ataatsimoorluta angusaqaqqinnissatsinnut upperinnilersitsimmata.
Nunavummiut, tikeraarnissinnut aammalu uagutsituulli pitsaasumik allannguerusussuseqarnissinnut qujanarujussuaq 💚
Ataatsimoorluta pinngortitaq paarisinnaavarput! 🌊🌿
