”Ataatsimoorluta pinngortitaq paarilluarnerutigu”.
Paasititsiniaanerup nutaap taanna taaguutigaa, taanna Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup saqqummiuteqqammerpaa.
Paasititsiniaanermi oqaluttuat nuannersut, pinngortitap paarsisuinik inuusaliat, nunarsuarmi anguniakkat 17-it pillugit ilinniutit, aammattaaq angajoqqaanut akuutitsiviusut aqqutigalugit meeqqerivinni meeqqat pinngortitamik paarsinissamut ilinniartinneqassapput.
Kammagiitta isumassarsiorfigalugu naalakkersuisoqarfiup kufferti sammisassanik, perorsaanermut sakkugineqarsinnaasunik imalik ineriartortissimavaa, taakkulu nunatsinni meeqqerivinnut nassiussuunneqassapput.
Kufferti sammisassanik imalik meeqqerivinni meeqqat silap pissusia, atueqqinneq, eqqakkat, uumasut naasullu pillugit ilisimasaannik soqutiginninnerinillu annertusititseqataassaaq, kiisalu tamatta pinngortitamik paarsinermi peqataasinnaasugut meeqqanut ilinniartitsinermut atorsinnaassalluni, Naalakkersuisoqarfik ilisimatitsivoq.
– Kuffertimi sammisassanik imalimmi ilinniartitsinermut aliikkusersuinermullu atugassat inuup pinngortitallu imminnut atalluinnarnerinut, tamattalu pinngortitap oqimaaqatigiinneranik atatitseqataanissamut akisussaaffeqarnitsinnik eqqaasitsissapput, naalakkersuisoq Kalistat Lund oqarpoq.
Nangipporlu:
– Neriuppunga nunarput tamakkerlugu meeqqat kuffertip imaasa akornanni, taamatullu pinngortitami tupinnartortaanilu tamani paasisassarsiulerunik pinngortitap pitsaanerusumik paarinissaanut isumassarsiorumaartut.
Kuffertit sammisassanik imallit meeqqerivinnit tiguneqarpata, perorsaasut meeqqallu atortussanik nuannersorpassuarnik soqutiginaatilippassuarnillu nassaassapput, taakkununngalu Pinngortitap Paarsisuinit inuusaliat, sapaatit akunnerisa naanerini meeqqat angerlaassinnaasaat, taamaalillunilu aamma angajoqqaavisa pinngortitamik paarsinissamik ilinniarnermut akuutinneqarnerinut atorneqarsinnaasut ilaatinneqarput.
Tamatuma saniatigut meeqqat eqqakkat pillugit nallukattat (nallukattat biilinik assiliartallit nalinginnaasut isumassarsiorfigalugit sanaat) atorlugit unammisinnaapput, taakkulu atorlugit eqqakkat pinngortitami piffissaq arroriartortarfiat, eqqakkat uumasunut qanoq ulorianartiginersut aammalu eqqakkat ajornanngitsumik atoqqinneqarsinnaanerat pillugit ilinniarsinnaapput.
Paasititsiniaaneq “Ataatsimoorluta pinngortitaq paarilluarnerutigu” paasititsiniaanerup Pinngortitap Paarsisui-sa ilagaa. Pinngortitap Paarsisuisa – nammineerluta puigoraangatsigu – kalaallit ileqqutoqaannik, tassalu inuit assigilluinnarlugit pinngortitami anersaap tarnillu – Inua – ataqatigiinnerinik eqqaasittussaavaatigut.
