Nunaqarfigisanni imaluunniit illoqarfigisanni pinngortitamik saligaatsuutitsinissamik aaqqissuerusuppit?
Pinngortitap Paarsisuisa ikinngutaatut nammineq kajumissutsimik suliniuteqarusukkuit Pinngortitamut Avatangiisinullu Naalakkersuisoqarfik saaffigiuk.
Pinngortitap Paarsisuisa ikinngutit pisariaqartippaat
Kikkulluunniit nunaqarfimmi illoqarfimmiluunniit sumiiffigisami pinngortitamik saligaatsuutitsinissamut aaqqissuusserusuttut Pinngortitamut Avatangiisinullu Naalakkersuisoqarfimmut saaffiginninnissaminnut tikilluaqqusaapput. Pinngortitap Paarsisuisa ikinngutaat nammineq kajumissutsimik suliniuteqartuupput.
Suut atortut nassiunneqartarpat?
Saaffigisigut, taava aaqqissuussinissinnut tapersersuissaagut. Suliniuteqartunut qujalluta tujuuluaqqanik, qungasequtinik, cigaretsit kimmikuisa puuinik assigisaanillu (nunguutsisimatinnata) nassiussisinnaavugut.
Qanoq iliorlunga ikinngutigilersinnaavakka?
Pinngortitap paarsisui ikinngutigilerusukkukkit pinngortitamilu eqqakkanik katersinissamut suliniummik aaqqissuinissat soqutigigukku, saaffigisinnaavatsigut:
Allallutit: pan@nanoq.gl Sianerlutit: 345416 Imaluunnit Facebookikkut quppernerput: ”Pinngortitap Paarsisui Naturens Superhelte”
Pinngortitap Paarsisui pillugit paasisaqarnerorusukkuit nittartagarput alakkaruk: www.inua.gl
Siunnersuutit
Qujanaq Nunarput paarilluarnissaanut peqataarusukkavit! Avatangiisitsinnut tamatta akisussaaffeqarpugut tamattalu eqqakkanik katersineq peqataaffigilluarsinnaavarput.
Ataani eqqakkanik katersinermik aaqqissuussinermi siunnersuutitsialaat atuarsinnaavatit:
- Suliniutigerusutat pillugu suleqatissarsiorsinnaavutit, sumiiffigisanni allakkanik nivinngaaviit imaluunniit facebook aqqutigalugu pisussamik aaqqissuussinerit nalunaarutigisinnaavat
- Isumaqatigiissutigisassat: ulloq, nalunaaqutaq aammalu sumi
- Eqimattakkuutaarlusi sumiiffiit assigiinngitsut katersiffigineqarsinnaasut agguataarsigit, taamaalillusi avatangiiseq annertunerusoq saliiffigineqarnissaa qulakkeerlugu
- Eqqaamallugu atoqqittagaanngitsunik aaqqateqarnissaq. Eqqakkat bakteriaqarsinnaapput.
- Sumiiffigisanni pisiniarfiit aaqqissuussamut taperseerusunnersut aperigikkit. Immaqa aaqqatinik ataasiartakkanik, nerisassanik, imigassanik allanilluunniit aaqqissuussamut atatillugu tuniserusussapput.
- Eqqakkat katersasi aammalu aaqqissuussinermi atortukusi iluamik iginnissaat qulakkeersiuk. Eqqakkat aaneqarnissaanik Kommune isumaqatigiissuteqarfigisiuk.
- Meeqqat inuusuttuaqqallu peqatiserisigit oqaluttuullugillu nunarput paarilluarnissaa qanoq pingaaruteqartiginersoq.
